陳鍵鋒玩rollerblade滾軸溜冰十分出色，他認為凡事應打好基礎，故中一時特地報讀rollerblade滾軸溜冰訓練班，接受正統訓練。陳鍵鋒又建議初學者應先學懂跌倒時如何應變，減低受傷機會。
陳鍵鋒在各種運動中，玩得最出色的要算rollerblade滾軸溜冰，不過他並非像街童般穿上滾軸溜冰鞋在街上亂走亂碰，而是接受正統訓練由基礎學起，且一學就學了三年，難怪訪問當天陳鍵鋒的技術如此純熟。
着厚襪打底
陳鍵鋒說：「我中一時，見到人哋玩rollerblade玩得咁叻，好想玩埋一份，媽咪知道後就幫我報讀rollerblade興趣班，一學就學咗三年。」
問陳鍵鋒玩rollerblade有何心得，他笑說：「心得就唔敢講，但有好多地方初學者係要留意囉。首先，着rollerblade嘅鞋一定要着襪打底，最好係着厚少少嘅襪，如果唔係對鞋同對腳摩擦時會好痛。」
踎低保平衡
陳鍵鋒續說：「跟住就係學點樣仆低，通常初初玩rollerblade都會跌到一仆一碌，如果求其起身嘅話，好容易會再跌過，跌多幾次唔單止整到手損腳損，重會影響到你嘅信心。
「如果跌低咗，最好就係踎低先，因為一個人踎低時重心係最低嘅，如果向前向後郁都可以用對手撐住，咁樣容易保持平衡，等個人重心完全聚喺中間後，就可以慢慢起身再玩，如是者試多幾次就唔怕跌，敢放膽去溜㗎啦！」
採訪：戴彩煥 攝影：何榮亮
