署理特首肥龍許仕仁噚日去咗九龍城區議會解釋佢份政改方案，啲民主派個個沉默抗議，結果得班保皇黨講嘢。但最搞笑係啲保皇黨突然內訌，無啦啦喺度互片，重勁過同民主派開火，結果要勞煩其他議員，勸住佢哋唔好喺司長面前「互揭瘡疤」。
話說自由黨嘅蔣世昌，無端端偏離黨嘅立場，出聲反對區議會委任制，講講吓重翻埋啲陳年舊帳，怪責啲委任議員唔肯支持佢，搞到佢做唔到區議會主席。有個委任議員葉志堅就𡁻番佢轉頭，話佢次次開會遲到早走，做唔到主席就應該撫心自問，唔好賴其他人唔支持佢，結果討論政改變咗兩人互片。
八方覺得，既然啲區議員成日記仇，質素咁差劣，與其搵佢哋選特首同立法會議員，肥龍不如收番個區議會方案，早日落實普選，等市民自己揀特首同議員好過啦！
爆料熱線：29290000、27860099
報料傳真：26239278
報料電郵：[email protected]