「嘩，乜你咁臭嘅！」有日阿標返嚟成陣魚腥味，唔知搞乜鬼，「你係狗嚟㗎！係隻手腥啲啫！」重遞埋嚟！躝開！我自小就最唔鍾意食魚，就係怕腥又怕鯁骨，阿標一向都知㗎！「都係為咗你啲番茄咋。」番茄煲魚湯？「乜你咁冇常識㗎，魚最豐富係乜吖？」「魚鱗。」「亂噏！係磷同鉀，對於種植瓜果類植物最有益㗎！」「我咪話魚～～磷囉！」我最叻狡辯！
翌日，阿標就帶埋我去搵賣魚勝、賣魚龍同賣魚超度搜集咗一大桶賣剩的魚骨、魚腮、魚皮、魚鱗……再去菜田度，掘個窿埋呀埋，「喂，唔好咁近呀，要距離根部一呎，個窿亦要掘深啲，如果唔係，啲魚腥味會吸引啲烏蠅嚟，喺度產卵就弊喇！」哦！但點知第二日去看，我埋嗰啲魚骨、魚鱗呀亂糟糟一地都係！「都話要掘深啲，要成呎深㗎，因為啲貓貓狗狗嗅覺好似你咁靈敏，聞到就會嚟掘㗎喇！」唔通又係隔籬隻Popeye累事！唉，又要掘過埋過，昨晚已經洗手辟腥洗到皮甩，今晚又要嚟過！「當你見到啲節瓜、番茄種到肥肥大大，紅紅綠綠，你就覺得洗甩埋隻手都值㗎喇！」咪講到我好似母愛咁偉大啦！
（四十五）
阿花