由五位花甲婆婆擔演的韓國電影《麻婆島》將在香港上映，邀請了葛民輝、陳國坤（小龍）、元秋及朱咪咪等聲演粵語版本。阿葛為聲演「姣婆四」一角，施展渾身解數，務求姣到出汁。元秋則因聲演「爛口蓮」而奉旨爆粗。
葛民輝、陳國坤、元秋及朱咪咪等人日前為韓國電影《麻婆島》粵語版配音。雖然阿葛的配音經驗相當豐富，但今次仍感到一定難度，他說：「韓文同廣東話好唔同，好似『我愛你』廣東話得三個音，但係韓文就可能有成九個音，所以捉口形呢一part係最難嘅。」
有殺傷力
阿葛聲演「姣婆四」一角，所以要配得比較嬌俏，他說：「我睇呢套戲時見到成班婆婆都一把年紀，但係我配嗰個角色重要姣到出汁嗰隻，嗰吓真係覺得佢哋冇得頂，雖然有番咁上下年紀，不過依然好有殺傷力。」阿葛又希望今次配音的原班人馬可以合作拍攝一齣喜劇，他相信定能擦出新火花。
而對於第一次為電影配音的小龍來說，亦感到一定的難度，他說：「一來韓文同廣東話嘅口形好唔同，初時我真係掌握唔到節奏，成日都要配多幾次先至OK，而且配音時得自己一個，所以感覺同做戲好唔同。」
嚇窒小龍
由於小龍初次配音，所以配音領班安排他最後一個配音，好讓他容易掌握，小龍說：「好彩我係最後一個先配，所以成套戲已經有晒阿葛、秋姐、咪咪姐嘅對白，咁先至易啲配，不過我聽到秋姐喺戲入面真係講粗口時，我都嚇咗一跳。」小龍覺得猶如見到麻雀枱上的秋姐。
採訪：李珮洳攝影：何國豪
場地提供：新羅寶
