內地證實有人死於禽流感，但藥業股未見有動作，亦唔見有投機者入市炒作，似乎市場尚未感到疫情的威脅。不過Cookie就叫阿虎要留意中國製藥（1093）、生命科技（1180）及長江生科（8222）等藥業股，聽講投機盤隨時會入市炒作，到時或者有混水摸魚機會。
生命科技11月初曾高調公布快將推出抗流感藥品《葡萄糖酸鋅噴鼻劑》，之後股價由0.088元炒上0.11元水平，急升25%，當時成交增至逾2000萬元，成交動力相當不俗，可惜股價很快出現回吐，噚日生科收報0.089元，差不多打回原形，成交亦急速萎縮。
中國製藥的表現與生科的情況差唔多，但噚日成交重有236萬元，有買盤肯接貨。
Cookie話，最近聽聞唔少中資話要向內地交數，所以資金暫時比較緊張，不過相信內地資金好快就會再回流入港股，到時應有動作。港股近排欲跌還升，似係收集多過開車。
公司回購 3G發牌
京信通信（2342）高層打開口牌，話股價表現尚未反映公司實際價值，將會動用最多5000萬元進行回購。京通股價上午初段升咗2-3%後轉牛皮，要追貨重有大把機會，結果以全日高位2.05元收市，升9%，成交547萬元。隻股早前因中期盈利大幅倒67%至3594萬元，加上內地3G發牌未有時間表而遭大戶減持，股價曾跌至1.50元。
京通主要向電訊營運商提供電訊設備，盈利前景主要受到內地何時推出3G牌影響。據講內地為要在08年奧運前有3G用，會在明年上半年發出3G牌，如果真係咁，意味京通會獲得可觀定單，屆時可能成為基金的搶手貨。
阿虎