董事學會噚晚頒發今年度傑出董事獎，請來財經事務及庫務局局長馬時亨頒獎。馬局長致辭時，不點名反擊美國證監會主席考克斯。事緣較早時，考克斯話建行在香港上市而唔去美國，係因為建行未達美國上市要求咁話。局長就話，外國有人可能眼紅香港，攞到4年來全球最大宗新股上市嘅刁；亦反映外國唔知香港股市上市要求已達國際標準，吸引到鄰近嘅內地企業來港。
呢一場暗裏角力，其實早在馬局長之前已經開始。早幾日證監會主席韋奕禮喺一個監管機構論壇上，亦諷刺內地公司去美國上市，其實係另有所求。韋主席話幾年前，有家大型跨國公司在紐約交易所上市，公司主席主持敲鐘開市儀式。一再追問下，該主席承認從集資或交易角度，在紐約上市嘅意義不大，但佢公司上市當日嘅相關電視報道所產生嘅宣傳同埋提高知名度的效應，估計約值1000萬美元，呢啲喺宣傳方面所節省嘅成本，相比上市費真是物超所值。韋主席嘅結論係，公司去海外上市各有原因，可能係好想主持敲鐘開市儀式!
講番噚日個董事獎，由港交所主席李業廣同行政總裁周文耀，奪得恒生綜合指數成份股公司傑出非執行董事同執行董事獎；另外新濠國際主席何猷龍、林麥集團主席王祿誾、城市電訊主席王維基就獲得主板公司傑出董事獎。大家覺得佢哋到唔到國際級董事標準呢？
李華華