煲呔曾風塵僕僕，去完英美加，前日又飛去釜山出席APEC會議，呢個會幾忙都要去，因為可朝見老闆胡錦濤，表面上重同胡主席平起平坐，你話幾high，是故佢噚日心情靚靚，笑笑口咁答咗好多條問題，之後就拖住愛妻出外食飯，慶祝噚日結婚三十六周年紀念。
玉照貼喺大堂櫃位
呢個大喜日子，煲呔夫婦選咗喺釜山最有名嘅溫泉旅店農心酒店度過，認真溫馨。唔講唔知，原來煲呔成為咗酒店嘅貴賓，八方望見員工喺大堂櫃位裏面，偷偷哋貼咗張煲呔玉照同簡介喺度，唔係通緝，係方便各位負責接待嘅職員，認住佢係香港特首，以免待慢。
農心酒店最特別係有一流溫泉設施，可以同時容納三千人使用，選擇又多，有長壽湯、足裏指壓湯、神仙湯等等，唔怪得煲呔見完記者之後，即刻好仔細咁睇大堂嘅溫泉設備簡介，似乎好有興趣同愛妻浸吓溫泉鬆一鬆。
八方知道煲呔住喺最高嘅九樓，酒店網頁介紹話九樓係貴賓專用樓層，設有寬敞嘅蒸氣浴設備，等住客可以喺100%嘅溫泉水中享受東來溫泉嘅氣氛。兩夫婦喺呢間咁有情調嘅酒店度過結婚紀念日，真係要幾浪漫就有幾浪漫呀。
彼邦都掛住廖冬冬
釜山現時凍到得番幾度，但係酒店內開行暖氣，難怪煲呔一入到嚟就話出面好鬼凍，室內就熱得滯，重講笑話要搵冬冬嚟搞搞佢。煲呔去到釜山都掛住廖冬冬，唔知曾太Selina會唔會呷醋。
八方搵人問政府發言人特首夫婦噚晚點慶祝結婚紀念？去咗邊度撐枱腳？當然冇回應啦，老細嘅私事，邊有人咁大膽過問，唯一煲呔愛將鬍鬚曾可能會知，因為佢噚日成日做電燈膽，陪出陪入，煲呔又當正佢係自己人，將來分分鐘接肥龍棒做CS。
所謂偷得浮生，離開咗香港，可以暫時忘記政改，忘記未開會就搞到一頭煙嘅策發會，佢老友大班率先起身，其他民主派又話唔排除拉隊走人，真係有排煩。所謂順得哥情失嫂意，易做就唔使搵你港英餘孽出山啦。
煲呔份工唔易打，加上佢有啲小器，所以更辛苦。八方噚日話45條關注組同中方反咗面，所以咁少人入策發會，有知情人話其實係湯大狀激親煲呔。話說湯家驊早前專程飛去英國出席WiltonPark研討會，湯大狀好似上庭咁力指煲呔話個方案行前一大步係自欺欺人呃鬼佬，煲呔當然好嬲，結果湯大狀咪乜都冇份囉。
爆料熱線：29290000、27860099
報料傳真：26239278
報料電郵：[email protected]