鄭大班請辭策發會，真正原因耐人尋味，佢私底下同人講，唔鍾意某人又唔妥某君，但都係次要原因，事關大班一直以為可以同政壇元老、地產富豪、民主教父等人平起平坐，一齊獲委入策發會行政委員會，但點知卻被塞入管治及政治發展委員會。睇在老友煲呔份上，降半級本應冇乜所謂，但一睇份名單，佢就扯火，名單上最令佢「彈起」嘅名字，唔係佢唔放在眼內嘅「名嘴」，亦唔係一眾左派，而係民主黨嘅盧子健。
本地政壇中人對盧子健唔會陌生，因為佢從事政治公關工作，光明正大為大財團穿針引線游說政客、政府，鄭大班未做尊貴議員之前，都係食呢行飯。佢見到盧子健榜上有名，本能反應係覺得政府大方，畀人入策發會搵生意，「攞正牌做說客」。關鍵嘅係有人認為咁安排無疑視兩者為同一級數人物，做政治花瓶事小，身價貶值事大，更傷嘅係名單由煲呔拍板，煲呔咁樣「評價」老友，想唔劃清界線都唔得啦！
爆料熱線：29290000、27860099
報料傳真：26239278
報料電郵：[email protected]