前日股價勁插水的3隻中資股，聽講大陸炒家已斬完倉，而貨源則由其他大戶接手。昨日3股出現強力反彈，經紀黃推介的銀建國際（171）升3.33％，收2.325元，但就唔夠中航興業（1110）表現咁強勁，最高曾升至1.47元，收1.43元，升10％，成交股數6298萬股，金額8919萬元。
另外，靜咗好耐嘅二三線股，最近零零星星出現炒作，例如剛公布業績由虧轉盈，盈利有1452萬元的百威國際（718），近日成交顯著上升，江湖傳聞話炒家埋位炒作之故。
雖然小初唔知人哋會sell乜嘢古仔，但計落條數，發覺隻股原來一啲都唔平，似乎唔多玩得過。話說百威今年年頭，股價重係幾個仙，但經過批股，股權出現轉變後，唔夠兩個月股價炒高咗幾倍，之後橫行咗幾個月，近日再異動。隻股前日急升後，昨日回落4.39％，收0.174元，仍然較年初翻咗幾番，市值接近10億銀咁多。
雖然百威昨日成交股數有成1.1億股，金額1961萬元，但睇落都係似私人派對，閒人免進嘅格局。
慕容小初