昨午3時前，個市耷吓耷吓，冇厘火氣，冇人估中埋單會有137點進帳，結果係有錢有膽識者做咗贏家。
期指高水6點，計埋滙控（005）下周三除息拉低恒指39點因素，期指實係高水45點。先幾日期指低水時講過，傳統智慧，低水代表壞事，但往往反底。今回高水，可能又唔係好事，個市興調轉來玩。咪勝利沖昏頭腦，升得急嘅C輪咪撲落去，向冇乜點升嘅C輪埋手，比較穩陣。
中銀C輪4644：中銀（2388）叫做收14.65元，爬高1格。成交金額最大嘅C輪9068，收53仙，升幅6%，諸輪中升幅最大。有啲冷門嘅中銀C輪，例如9346與9161，並冇因為正股冇跌而定位，反為大散20-30%。鬼咩，溢價高高（9346溢價15%，9161溢價12.8%），稍稍收縮，輪價好難有運行。
中銀C輪搵件短炒，4644數據較啱睇。明年2月尾夠鐘，輪價7.1仙，溢價3%，槓桿率20.6倍（有效13.3倍），引伸波幅15.8%。
德昌C輪9110：德昌（179）升10仙，收7.65元，唯一C輪9110升夠16.5仙，突晒。
隻輪昨收0.51元，明年3月尾到期，溢價11.2%，槓桿率15倍（有效7倍），引伸波幅34.6%，買唔過。
章盛