還記得有首歌：「邊個話我儍，我請佢食燒鵝……」不過燒鵝動輒都要百幾蚊，請你食嗰個都真係儍。鵝貴但鴨平，𠵱家重有$38隻，下次俾人話儍，都係請佢食燒鴨抵啲！
記者：梁學文
攝影：伍慶泉
Model：Algie、Jessica（thegroup）
平時全隻都要$60
每晚六點之後就有特價，晚市去食晚飯，點一隻燒鴨、一個羊腩煲加兩個小菜，四個人去食，一定會捧住個肚出來。平時出街買全隻燒鴨最平都要$60，𠵱家逢禮拜一至五晚去食，只係$38。趁住天氣轉涼，叫多個羊腩煲暖暖胃就更好。去一般酒樓嗌一個羊腩煲，無$50都落唔到樓，不過呢度就只要$28就有得食，食完真係暖番晒！
9點後小菜$18
九點鐘消夜時段至去食，重有$18一個小菜任你揀，四個人計埋連茶錢、酸菜等等，都係$158.4，除番開一個人都唔使$40，認真超值！若果喺晚市點番同樣菜式，埋單計數要$312.4，價錢就差唔多多咗成倍，即係每個人差唔多要$80先可以埋到單。所以在消夜時段去食飯，要燒鴨全隻、羊腩煲同兩個小菜，四個人去食就最抵。
為咗證明特價菜式有無偷工減料，我就帶埋個磅去，秤吓隻鴨有無減磅。實地測試結果，並無因為特價時段而縮水，又再一次證明「一分價錢，一分貨」未必係絕對嘅。
搽上秘製醬料：明爐燒鴨
全隻$98（6點前）/$38（6點後）
明爐燒鴨用薑、乾葱、蒜茸、八角等醃料先醃，再搽上秘製燒醬，然後入爐燒兩個鐘，一上枱就好香。燒鴨皮脆肉香，肉質鮮嫩，而且呢度全部鴨隻都有檢疫證明，可以放心食用。
嚴評結果：
特價前：2.2千克
特價後：2.1千克
鴨本身都有大有細，輕咗100克（四分一磅都唔夠）都唔過份，過關！
煙肉芝士扒西蘭花
$38（9點前）/$18（9點後）
跟一般芝士焗西蘭花不同，呢款扒西蘭花唔用焗，改用芝士汁淋上面扒，入口唔會太乾身，口感比焗嘅特別。
嚴評結果：9點前後都係八塊煙肉，無多無少，賣相重靚好多！
燒汁芝麻雞球
$38（9點前）/$18（9點後）
呢款中日Fusion菜，用日式嘅燒汁混以老抽和糖等材料，先爆香雞球，再加醬料齊炒，上碟時再加芝麻，入口嫩滑。
嚴評結果：特價嗰碟重靚過正價，味道一樣無分別。梗係合格啦！
雙冬羊腩煲
$68（6點前）/$28（6點後）
雙冬羊腩煲醬汁的材料有八角、南乳和腐乳等，再配合秘方熬足兩個鐘，羊腩入晒味。羊腩入口唔會羶，全靠師傅用薑同八角醃過。
嚴評結果：經點算過後，一共有15件羊腩肉，比唔係特價時少咗兩嚿，而其他配料就無少到。唯一要彈係同原價一樣唔包蔬菜。
同場必叫！豆沙壽包
$4.8（早午市供應）
呢款豆沙包係呢度其中一款特價點心，一籠有三個。皮和豆沙餡嘅配搭非常合拍，唔太薄又唔太厚，厚度啱啱好。可惜無得外賣，如果唔係買來賀壽，重抵過買蛋糕呀！
現場食客有讚有彈
明星海鮮舫（26353788）
地址：沙田大涌橋道55-57號
座位：1,600個
營業時間：7:00am-12:00mn
