昨日市場最熱門嘅話題，當然係中航興業（1110）、騰訊控股（700）同埋銀建國際（171）晏晝突然勁插水事件。市場流傳最廣嘅版本，就係話有大陸炒家因為手緊，又急需班水回京，所以將手頭上嘅股票盡沽套現。
小初心諗，如果呢個傳聞係真嘅話，呢位大陸炒家都來頭唔細，皆因呢幾隻股size有番咁上下，粗略估計呢位仁兄個倉起碼有幾億銀貨，否則唔會沽得咁觸目驚心。
至於3隻股之中，邊隻可以撈底博反彈？經紀黃就話銀建可以諗吓，皆因臨尾市有大戶出嚟收貨，而其餘兩隻就唔多覺。
另外，上市無耐嘅華力控股（3366），股價日日係咁升，昨日最高見過1.63元，收1.57元，再升3.97％，成交股數673萬股，金額1050萬元。現價較招股價1.30元，升逾兩成。
經紀陳話，雖然華力阿媽後台強勁，但要注資都起碼係上市後6個月嘅事，家陣只係乾炒牛河格局。
慕容小初