返國內打工的港人愈來愈多，當中唔少係管理高層，薪水有番咁上下，之不過，國內10月1日開始實施咗新嘅勞動及社會保障政策，規定喺國內駐守超過3個月嘅港澳台打工仔，同埋有聘請呢啲專才嘅企業，以底薪做基準，按唔同省市嘅規定，支付社保費用，搞到啲企業同打工仔牙痛咁聲。
香港專業人才協會主席蕭乃新同華華講，佢哋上個月搵咗280間港資及外資企業嘅高層做調查，發覺絕大部份，都唔贊成呢個政策，梗係啦！雖則話費用係由企業同打工仔一齊承擔，但企業要畀大部份，深圳要23%，廣州就要畀28%，上海重去到40%以上，真係唔講得笑。
你有你反對，政策照樣實行，畀錢係事在必行，不過好多人都唔知點申請同畀錢，蕭主席話已經問過國內嘅勞動廳攞資料，點知對方竟然話「會喺幾個月內回覆！」政策已行，但就未有實質嘅程序，搞到企業同打工仔鬼咁迷惘。