有兩單東南亞國家新聞，睇完令人覺得香港好可愛，起碼到目前為止，前人遺留落嚟嘅一套制度重可以保護我哋，人權未受踐踏。雖然，陶傑講嘅「豔骨與良心擺上枱」（十一月十五日），令人驚驚地，不過，睇埋以後呢單案如何發展啦，如果劇情如陶傑所料，香港變「酸」，冇眼睇。
所講嘅兩單東南亞新聞係，第一單：十一月二十八日中午，一位印尼寡婦SuciwatiMunir會喺上午十至十一點到FCC（外國記者會）講佢嘅丈夫被印尼情報局毒死案。Suciwati之丈夫MunirSaidThalib係印尼人權鬥士，爭取印尼人權不遺餘力。二○○四年九月，呢位先生坐印尼航空公司Garuda航機去阿姆斯特丹，在飛機上中砒霜毒身亡。蘇絲屈蒂女士要求印尼總統委任獨立調查委員會調查，委員會出咗報告，話印尼情報局與Garuda航機人員聯手做事。但報告發表後，如泥牛入海，乜事都冇發生，蘇絲屈蒂女士及家人就收到死亡恐嚇！
爭取人權？毒死你先，怎奈我何！
文明好多嘅星加坡又點？獅子城夠晒乾淨，人民有錢，政府夠效率，經常喺任何排名榜上壓倒香港，但原來星加坡對外傭十分苛刻，星加坡人請印傭、菲傭、斯里蘭卡傭有十五萬人咁多，外傭不受星加坡僱傭條例保護（此條例列明每周假期，最高工時），薪水甚低，一年到尾冇假放。最近星加坡政府受到外國好多批評，於是准許外傭每星期放假一日，點知好多星加坡人反對，傳媒熱烈討論，其中一個最大聲反對嘅理由係：畀外傭放假，僱主冇得監控，咁外傭搞大咗個肚，點算？外傭大肚，星加坡僱主要負責費用，故此，好多僱主唔畀外傭放假。
星加坡人教育程度高，收入好，但一講到切身利益，外傭人權就立即拋諸腦後，點同我哋香港人比呀？我哋啲外傭每星期放假一天，公眾假期放足，人工高出星加坡一倍，香港實在係外傭天堂！