無綫台慶即將於後晚舉行，連日來女主角爭獎風波不絕，連影壇巨星周潤發亦關注此事，自稱「電視精」的他昨日指「最佳女主角」獎應屬《我的野蠻奶奶》的汪明荃和胡杏兒之爭，而郭晉安則穩奪「最佳男主角」，又笑言無綫應增設一個「最佳外語」獎給《佛山贊師父》的黎彼得。
出身無綫的周潤發七三年加入藝員訓練班，至八六年才進軍影圈，不過他離開無綫後仍對母台的劇集情有獨鍾，昨日發哥與杜琪峯在尖沙嘴出席「第三十屆香港國際電影節——鮮浪潮大專生短片競賽」記者會時，透露現時每天追看無綫播出的三線劇集《胭脂水粉》、《阿旺新傳》及《佛山贊師父》，更大讚劇中部份演員表現出眾，建議無綫應增設一些獎項表揚這些出色演員。
小賭怡情
投注十蚊買阿旺出線
近日外界普遍認為「最佳女主角」獎是阿姐與郭可盈之爭，但發哥昨日則表示睇好阿姐與胡杏兒，他說：「阿姐好犀利，《我的野蠻奶奶》喎，胡杏兒都掂，嗰期出好多劇，合約女演員冇辦法，公司力撐。男主角就梗係阿旺（郭晉安）啦！陳豪九倍幾（指博彩賠率，實為六倍），唔得！阿苗（苗僑偉）八倍（實為五倍），太冷，我梗係買大熱，我買少少，十蚊啦！」
發哥對《阿旺新傳》一劇的角色更是瞭如指掌，還盛讚劇中演員表現出色，他說：「『飛躍進步』獎就梗係畀湯盈盈，阿好喎！重有嗰個做孟加拉（劇中角色實為巴基斯坦人）嘅李家聲，都應該攞吓啦！」
發哥續說：「不如加多個獎畀李國麟，佢要攞『性格演員』獎，《胭脂水粉》做得好吖，重有陳豪都幾好㗎，Benz雄（許紹雄）就要攞男配角，佢同盧宛茵都好好，女配角係佢。哎吔，《佛山贊師父》都好好喎！點解冇『最佳動作』獎呀？要建議整個獎畀元寶至得，TVB畀個獎佢，大家自己人有乜嘢所謂？佢都係啱啱炒，成年咁多動作戲，佢做得最出色，梁家仁死嗰場，嘩！打得幾好睇呀，啲桃花跌落嚟，冇得頂，阿彪哥（元彪）我又鍾意。」
眉飛色舞
指阿姐應兼奪飛躍獎
發哥說到眉飛色舞之際又忽然想起黎彼得，他興奮地說：「唔記得重有黎彼得㖭，佢講嗰啲唔知乜嘢話夠搞鬼，應該加設個『最佳外語』獎等佢攞。」其後發哥又雀躍地說：「不如畀阿姐攞女主角同飛躍進步兩個獎，又有車又有樓做獎品，百幾粒喎，講講吓，我都想整番套劇拍，再買埋外圍㖭，幾開心呀，星期六一定撲住睇台慶，我年年都有睇，母台喎，我冇TVB邊有今日，三線劇都睇晒，我係電視精嚟㗎！」
發哥談完台慶，又讚郭富城得金馬影帝是實至名歸，他說：「城城好有型、肌肉好fit，又靚又英俊，又多fans，佢部戲我有睇，擘口嗰場好有感情。」
而黎彼德昨得悉發哥大讚他在《佛》劇講的鄉下話生鬼，又提議無綫頒發「最佳外語」獎給他後，他在電話中回應說：「發哥真係客氣，聽到都好開心，我做演員都唔係望攞獎，喺戲入面我講嘅係南海話，因為我媽咪係南海人，細個聽得多，所以向監製提議講呢啲話，因為佛山都係喺順德、南海附近，講呢啲話親切啲，咪大膽咁加入去，出嚟效果都唔錯。」
採訪：魯萍
攝影：仇志德
