一年一度嘅3G世界峯會暨展覽會，噚日喺香港舉行，吸引咗150個參展商同埋160名講者參與，唔知係咪中國就快發出3G牌照，今年特別多參展商想高調曝光。
華華接到超過10個邀請，希望可以為佢哋做訪問介紹產品服務。咁又係嘅，中國已經係全球最大嘅流動通訊市場，一塊新嘅3G肥肉正待各方爭食。
投資推廣署盧維思係大會嘅主禮嘉賓之一，佢除咗喺會上大力推介香港，叫人嚟投資外，重透露該署今年協助220間外地公司嚟港設點嘅工作目標已經達到，估計全年可增至230間，明年目標係240間。
喺會前唧空檔時間，大會重播放咗投資推廣署嘅宣傳短片，蘭桂坊之父盛智文、立法會議員陳智思，同前美國商會主席詹姆遜粉墨登場，扭動身體高唱「wearewearerockyou」，以動感香港形象，歡迎外商來港投資。