昨日，又見到有大屠殺場面，好多股票都「無情情」咁大崩圍，市場消息，莫衷一是，有謂基金散貨，亦有謂有基金要撤離香港市場；亦有反面消息，話有大戶在高位散貨後，刻意大插插，然後在低位兜番貨。
以有大成交計嘅，跌得最「金」係中航興業（1110），低收1.30元，大跌0.27元，跌幅17.2%，成交7400萬股，總值1個億，至於成交最大嘅係銀建國際（171）波幅亦最犀利。
銀建噚日早市重「好哋哋」，成過2.625元，但中午時分，突然幾家大行嘅沽盤湧晒出嚟，最明顯係大摩同中銀，中午時已收2.375元；下晝一開市，直情係過山車咁由高處向下俯衝，幾球幾球貨咁插落去，結果2元大關都不保，跌到1.98元先企得住。由高位2.625元落到1.98元，兩個鐘頭嘅交易時間，大跌24.5%，場面慘烈，好多股民都在低位忍痛斬倉。
撈騰訊者多中伏
3點半過後，大行掉轉槍頭，係咁掃番上去，但由於斬倉者眾，幾乎每一個位食嘅貨都以百萬股計，結果掃到2.25元收，半個鐘頭內，食咗過億股。一場大屠殺，遍地屍骸，財富亦大轉移。銀建噚日跌0.30元，跌幅11.7%，成交2.25億股，總值近4.8億元，喺10大成交榜排第9位。
另一隻血流成河嘅係騰訊控股（700），又係在中段之後失守，一路插到尾，低收7.30元，大跌1.15元，跌幅13.6%，成交近4000萬股，總值逾3億元。騰訊大部份街貨都喺基金手上，散戶揸得唔多，但噚日跌落嚟嗰浸，沿途都有唔少人博反彈，但全部中伏，無一不黯然離場。
3隻大跌股中，中航興業同騰訊都低收，銀建由1.98元上番2.25元收，反彈算係最有力，若然大戶收夠籌，話唔定隨時可以造番上去。
自從內地話不良資產唔可以賤賣後，銀建股價就一直冇大起色，最近由2元上到2.70元水平，就係市場有消息，話銀建有好大機會再攞到「資產包」，若然屬實，在3元以上做咗銀建長線捧場客嘅大中小戶，就可重見天日。
郭兆誠