政務司司長許仕仁近日頻頻出動，曝光率拍得住曾特首有餘，前日佢去赤柱出席比利時航運勳章頒授儀式做嘉賓，肥龍同八方講，佢最鍾意食比利時西餐同青口，雖然好多人覺得呢啲食品好creamy，好唔健康，但佢話自己都幾十歲人，冇所謂啦！
日日走幾場嘅佢，當日都唔例外，許司長講唔夠兩句，又急急腳離場，八方問佢下場去邊？佢順口話約咗柏林愛樂個總指揮SimonRattle（西蒙歷圖）食飯，前兩日聽完柏林愛樂未夠皮，今日做東請食飯再傾過；睇怕佢緊張聽音樂重多過政改，八方打蛇隨棍上，問吓司長請大指揮去邊度食？肥龍好鬼馬笑住回頭話：我唔話你知！
傳真︰2623-9278
電郵︰[email protected]