PSP全球出貨量突破1,000萬大關，不過在日本老家仍輸畀老任成條街，加上聖誕黃金檔快到，故SONY急急腳玩減價，務求盡快搶攻更多市場。
香港行貨PSPValuePack已率先減至$1,780，不過今個星期最新派貨嘅GigaPack重激！跟條1GBMSD都只係$2,180，除番條數「支的」只係四嚿水！加埋行貨原裝保養，的確令人好心動。
各大Game舖AV舖一早收到風，知道今次SONY要錢唔要貨，到時散裝1GBMSD肯定無運行，所以早排不約而同率先推冧個價。繼跌破$600心理關口後，個個都重係怕「坐貨」，繼續質低個價；到今日為止，1GBMSD最新報價已達$550有找！重要係有PSPLogo（傳聞比舊卡快，不過仍不及SanDisk），賣到咁賤，連假卡集團都冇興趣。而2GBMSD亦受波及，由早前$1,499周街缺貨，到家陣$1,080重有現貨。
順帶一提，SONY新推出那張強調HiSpeed嘅2GBMSD，原裝賣成二千幾蚊，故吸引假卡集團青睞，大家捨得畀錢都要小心呀！你想知HiSpeed賣咁貴有幾Hi？Sorry，官網規格表兩張卡係一樣20MB/PS嘅！好明顯官網做得求其，若規格一樣，可以賣Double以上，咁SONY又真係幾Hi喎！