爆機狂迷：NDS首隻Wi-Fi對打Game<br>MARIOKARTDS全球大激鬥

爆機狂迷：NDS首隻Wi-Fi對打Game
MARIOKARTDS全球大激鬥

細個嘅時候阿媽唔畀你打機，梗係會話打機自閉，影響社交能力，不過今時唔同往日！任天堂最新推出嘅《MARIOKARTDS》，係NDS第一隻可以透過無線網絡對戰嘅遊戲，收費全免，畀你隨時同世界各地嘅玩家鬥車，真係爽呀！以後邊個重敢講話打機自閉？記者、攝影：梁瑋瑜

遠自GameBoy年代，已經有連線對打呢回事，自己打得幾勁都好，梗係要搵人較量吓先至過癮，發展至今時今日，對打亦唔再局限於一條線之間，任天堂喺呢個時候推出第一隻透過Wi-Fi打嘅NDS遊戲，絕對是一眾NDSFans望穿秋水之作，難怪隻Game開賣首日，馬上由$260炒上$320！不過幸好大貨第二朝馬上到貨，Game價已回落至$238的可接受水平，所以𠵱家絕對入得過！

有無線Router上網4人打

既然可以用Wi-Fi上網，大家最關心嘅問題，當然係「喺香港可唔可以用得到」？答案係得！只要你屋企有一個無線Router，就有機會得，想知道邊個型號嘅Router支援得好啲，可以上到官方網站 http://www.nintendowifi.com/customersupport/supportedRouters.do（選地點UnitedStates）查詢，香港人最常用嘅Linksys、DLink等Router牌子都冇問題，而Buffalo雖然榜上無名，但小記試過佢嘅WBR2-G54都一樣冇問題！

■可以設計一個代表自己嘅Logo。

■大炸彈一嘢炸爆前面個選手。

■鬥車鬥到落沙灘，好正！

■雙屏幕上面顯示玩家嘅車，下面就有地圖同埋排名。

機連機一帶8人打

如果你屋企冇無線Router，都唔使心急去買，因為任天堂將會推出一個USBWi-FiConnector，只要接上電腦USB插口就可駁上網，不過呢個裝置要下星期先有貨（約$230）；小記試過用隻Game連接Router玩，其實設定都幾簡單，上到網後自動會連接3個用家一齊玩（需各自有Game），感覺幾爽快！至於大家關心嘅美版、日版Game對應問題，由於暫時只有美版《MARIOKARTDS》推出，同日版Game能否作網上連線仍是未知數，所以大家要留意。
至於未搞Router嘅玩家亦唔使灰心住，事關《MARIOKARTDS》亦配置有傳統嘅無線連線對打，而且一餅帶重可以8個人齊齊玩，約埋一班Friend落CoffeeShop一樣可以打餐飽！

■冇Router唔緊要，可以買隻USBConnector。

■Router只要支援AOSS，就可以直接設定。

■短短半分鐘已經可以搜尋到附近嘅無線網絡。

■機身內置有3個Connections俾大家設定。

新增任務模式

NDS遊戲一向日版出先，過多一頭半個月先出美版，今次《MARIOKARTDS》反而先推出美版，對於唔識日文嘅玩家絕對係一個好消息！隻Game收錄咗超過30條賽道，包括全新加入嘅賽道，同令人勁懷念嘅舊GC、N64及GBA版本賽道，內容夠晒豐富；有玩開《MARIOKART》嘅玩家都一定記得，呢個遊戲最正嘅地方就係可以用寶物影響其他賽車手表現，今次特別加入一隻會令到對方畫面變黑色嘅墨魚做寶物，好過癮！另外NDS版本亦加入咗Mission模式，玩厭咗鬥快，可以試吓玩吓唔同任務，好似MiniGame咁玩，都幾有新意㗎！