去年領匯上市觸礁，大班鄭經翰見報率爆晒燈；今年領匯招股期間，鄭大班曝光率一樣咁勁，佢老友曾特首前日委任佢做策發會成員，點知大班一委任就唔撈。
華華收到前晚大班出席咗一個由黃宜弘同埋梁鳳儀為倪匡洗塵嘅晚宴，佢喺席間完全無提過佢唔撈策發會一事，佢見到紀文鳳，重走上前恭喜佢做咗策發會成員，搞到現場嘅人，都諗唔到大班竟然會請辭。
大班前晚反而提起領匯，事緣現場有人提起領匯買唔買得過？大班二話不說即刻話，講明賤賣資產，梗係要買啦！口痕友話，如果跌咗點先？大班好豪氣咁話：「跌咗就搵我，用原價幫你買番！」如果呢句話係孫明揚或者梁展文講就好喇，華華立即叫齊親戚朋友飛身認購領匯。
講番前日黃宜弘夫婦設宴款待倪匡，希望佢老人家留番喺香港，梁鳳儀重話多得倪匡將佢啲書畀佢出版，又話佢第一次寫小說得到倪匡嘅鼓勵。
噚日宴會嘅賓客真係嚟自五湖四海，連大班嘅舊拍檔黃毓民都有到。梁鳳儀介紹毓民嘅時候話，佢老公黃宜弘對國家好忠心；而毓民就對國家有微言，毓民立即澄清話，佢對國家無微言，只係對共產黨有微言。
雖然黃宜弘同埋黃毓民政見不同，但原來佢哋好老友，雙黃前晚重合唱咗隻「愛拼才會贏」㖭！不過，華華諗雖然兩人唱同一首歌，但佢哋兩個拼嘅嘢可能唔同啫！
李華華