中國遠航總裁魏家福昨日獲頒比利時航運勳章，佢話得到呢個獎，係佢38年航運生涯中最開心嘅事，難怪成晚心情鬼死咁靚，興奮到周圍搵人影相，許仕仁、盧維思、趙式明之外，就連華華同攝記哥哥都唔放過，可想而知佢幾咁高興！
比利時領事PatrickNus同華華講，呢個獎只係頒畀對中比兩地航運有極大貢獻嘅人，所以唔係年年都有人得到，今次特登揀喺「比利時國王日」頒發，當地人對呢個節日好重視，喺呢日頒獎係好高榮譽，除咗魏家福之外，Univan創辦人CharlesVanderperre同Anglo-EasternGroup既PietCremers都得獎。
魏博士同華華講，1967年開始行船，前後16年，由通訊員做到船長，第一次航程由廣州出發，目的地就係香港，艘船叫做唐山號，所以佢對香港有感情，話香港國際航運的地位，永遠都唔會被人取代，家吓中遠航喺香港總資產有500億人民幣，係集團在海外最大的投資地，佢重會不斷投放更多資源喺香港，擴大業務，家吓係阿二，希望可以快啲成為世界第一。
講完大計，魏總又同華華講，船上嘅生活真係非常單調沉悶，重清一色係男人，又要同屋企人分開，都咪話唔慘，所以佢家下雖則「上咗岸」，都會特別關心旗下5萬船員嘅工作。