上個月，SonyEricsson喺倫敦發布咗今年第四季兩款壓軸大作──W900i同P990i！估唔到其「真身」咁快付運抵港，並率先讓傳媒試玩。不負眾望，第四位「WALKMAN」系列成員W900i，除咗大玩純黑、純白色旋轉機身外，更首度支援3G，令下載音樂更見簡單。至於同列為3G嘅P990i，大玩PDA「分唇」嘅同時，亦不忘在機身上加入播歌專掣，擺明車馬玩音樂！睇嚟，3G跟音樂，都係未來強機嘅發展大趨勢！
記者：陳國輝 攝影：陳偉強
SonyEricsson一連展示出五款針對唔同用家嘅手機。除咗於網上被討論得熱烘烘嘅高階機W900i以及P990i之外，另外重首次公布咗三款強打低階市場嘅J220i、J230i以及Z300i。值得一提嘅係，雖然五款新作統統以「真機」示人，但「分唇」最強最多嘅P990i，卻只提供未完成版本讓記者試玩，呢點較令人失望。推出時間方面，W900i以及Z300i已定於今年第四季，即係大家唔使等好耐就有得玩喇；至於其餘三款平價入門機，就要等到明年第一季，售價仍有待公布。
W900i內置470MB記憶體
掛「WALKMAN」招牌喺身嘅W900i，首次採用3G制式。配備2.2"QVGA靚芒情況之下，玩VideoCalls嗰陣畫質固然實淨；同時，當面對面傾偈嗰陣，重能夠立即切換為相機或者攝錄機模式拍攝，用嚟製作個人靚相/片再Send畀朋友就最啱！如果配合埋「WALKMAN」功能一齊用嘅話，玩家重可以透過3G嘅快速資料下載，進入網絡商嘅音樂網站「單撈」MP3歌，喺街上就可以即時換歌兼試聽，都咪話唔盞鬼！W900i內置容量為470MB，若加埋支2GB卡嘅話，最多可以儲存1,240首歌，真係一般MP3機都可以行埋一邊。
一指式推蓋夠輕鬆
W900i嘅機身仿照咗舊款S700i樣式，選用最潮嘅旋屏設計，雖然體形冇想像中嘅W550i咁細部，但係全機身大玩純色，感覺就極為討好！今次特別喺旋屏處加入彈弓式設計，憑一隻手指輕輕推一下，機身就會自動打開，已經唔使再用雙手玩咁麻煩。
另值得一提嘅係，W900i就算喺合蓋情況之下，仍然可憑五方向式「WALKMAN」鍵盤嚟操作播放、暫停/停止以及選曲等功能，呢個Design都可謂夠晒方便！
室內試相
W900i貫徹旗下最強嘅200萬像素及自動對焦鏡頭，速度好快；室內試相嘅畫質好清楚而且實淨，只係補光燈稍嫌唔夠勁，令到整體有少許偏暗。
W900iProfile
制式：WCDMA/GSM三頻
體積：109×49×24mm
重量：148g
屏幕：26萬色TFT彩芒
通話時間：500（語音）/100分鐘（視像）
備用時間：370小時
主要功能：3G下載音樂、視像通話、200萬像素鏡頭、自動對焦、WALKMAN播放器、470MB內置記憶體、支援2GB卡
推出日期：今年第四季
售價：待定
P990i歌影大升級
走商務路線嘅PDAPhone「P」系列，一向畀人操作穩定、介面易用嘅感覺。P990i承接現時最新嘅SymbianOSv9.1系統以及UIQ3平台，記者雖然冇機會試玩其完全版本，但從測試版可見，音樂介面設計已比之前P910i更「圖形化」，用起嚟更易上手；同時，今次喺影相以及音樂方面亦提升咗好多！特別係當P990i反轉之後，機背形如K600i般，DC感好重；鏡頭更特設旋扭式保護蓋，開蓋時會自動啟動相機，影相極之方便！就算冇配備「WALKMAN」播放器，然而機身仍不缺播歌專用掣，只需要㩒一下就能夠Play歌，喺Symbian機當中可謂相當罕見！
P990iProfile
系統：SymbianOSv9.1
平台：UIQv3.0
制式：WCDMA/GSM三頻
體積：114×57×25mm
重量：155g
屏幕：26萬色QVGA芒
通話時間：180-540分鐘
備用時間：約400小時
主要功能：內置Wi-Fi、輕觸屏幕、揭開式鍵盤、視像通話、200萬像素鏡頭、80MB內置記憶體、支援4GB卡
推出日期：06年第一季
售價：待定
同場加映
好色換殼入門機大晒冷
除咗以上兩款旗艦重頭戲，SE還全球同步發表咗三款專攻低階玩家嘅型號。特別之處係三款同時支援Style-Up外殼，夠晒好色！
Z300i
崇尚令面高貴
圓到好似鵝蛋形嘅機身，具備花崗岩灰色及紫水晶紫色兩款面殼替換；另配一個單色外屏幕，方便睇時間或來電號碼。
Profile：GSM雙頻、6萬5千色內屏及單色外屏、32和弦
推出日期：今年第四季
J230i
配備FM特快鍵
最值得注意之處，係具備一鍵式啟動FM功能，備有立體聲效果；另外機面殼可以更換，有雪白、桃紅以及深藍三種色揀。
Profile：GSM雙頻、6萬5千色彩芒、32和弦、立體聲FM
推出日期：06年第一季
J220i
簡單易用為本
喺方向掣處列明圖示目錄，㩒任何一個方向都能即時打開電話簿、寫短訊、設定鈴聲等，機身配有黑及藍色兩款。
Profile：GSM雙頻、6萬5千色彩芒、32和弦、快捷功能掣
推出日期：06年第一季
