港股前日散111點後，昨日有啲驚險，曾經跌過110點，埋單只係唔見2點。國企跑贏其他指數，升44點，升幅0.9%。
國企主要由兩隻油股中石化（386）與中石油（857），及交銀（3328）帶住上。3隻重磅股總共令到國指上升24點。
中石化C輪9525：中石化收3.50元，漲3格。中石化近期頻頻有私有化旗下公司動作，國際油價軟順，又對佢嘅下游業務有幫助，基金收貨收到開巷。
中石化C輪，最勁嘅3950，升幅36%，收4.9仙，有21球易手。隻輪年尾到期，溢價12%，槓桿率71.4倍（有效15.6倍），引伸波幅33.7%。隻輪溢價高，追貨要諗過先。其他升幅超過15%嘅中石化C輪，都有6隻。短炒，可以揀9525，昨收23.2仙，升幅得4%，跑輸其他同類C輪好多。
隻輪明年5月初夠鐘，溢價16.6%，槓桿率15.1倍（有效6.4倍），引伸波幅36.5%。
老實講，隻輪屬價外，雖然壽命長，槓桿率唔算太大，溢價唔得吸引，所以只宜短炒，炒一兩日，或者幾個鐘頭。
中企C輪9652：如果睇好國企，買中企指數C輪，可向9652埋手。隻輪明年3月尾夠鐘，輪價22.4仙，溢價6.3%，槓桿率10.1倍（有效6.5倍），引伸波幅30.7%。
章盛