羅蘭（金像影后）：
阿姐嘅《我的野蠻奶奶》我都有睇，可盈嗰部《酒店風雲》就冇乜點睇，我覺得阿姐演野蠻奶奶做得幾好，我以前都成日演家婆角色，但我演嗰啲係惡家婆，同阿姐演嗰啲好唔同，而阿姐以前演嘅角色都係比較斯文同文靜，今次咁搞笑，對觀眾嚟講好有新鮮感。
曾謹昌（《功夫》編劇）：
阿姐係資深演員，好明白電視嘅運作，今次「野蠻奶奶」嘅角色，對佢嚟講係一大突破，成個故事好適合做電視劇題材，畀屋企啲家庭主婦睇，尤其是講婆媳嘅糾紛，好容易引起觀眾共鳴，以阿姐今時今日嘅地位，我覺得佢今次贏面好大。
鄧特希（《妙手仁心》監製）：
講演技，佢哋兩位都係毋庸置疑㗎啦，但阿姐用咗幾十年時間建立起「阿姐」嘅形象，突然間玩突破演搞笑角色，自然會畀到觀眾一份新鮮感，以及一個好強烈嘅對比，令觀眾留下深刻印象，所以阿姐方面會着數啲。
