細菌病毒當道，香港人普遍擺嘢入口都穩陣咗，唔再一味貪平貪抵，恐防食壞身子得不償失，幫襯老字號係一個好辦法，因為開業有番咁上下年份嘅商號都非常注重自己嘅出品，搵錢固然重要，但面子也攸關，加上要維持有返頭客，所以零舍加幾錢肉緊。
幫襯「越華會」至少超過十五年，當時尚在銅鑼灣上樓舖，「辣椒炒蟹」加「油鹽水蜆」，幾支大啤，吃至通宵達旦，後來搬到灣仔鵝頸橋，幾年前在筲箕灣再開分店，當然冇咁就腳，但勝在門前可停車，除笨有精。
「炸豆腐」冇花冇巧，麻雀牌咁大的一件豆腐，外邊炸至卜卜脆，裏面的豆腐呈半液體狀，可以啜住嚟食，極考功夫，不過記住小心燙嘴。「咕嚕肉」是餸飯不朽名菜，入口時除了脆口外重有多少黏牙Feel，酸甜汁唔會嗆喉，啖啖肉。「葱油走地雞」的視覺效果頗為震撼，全隻雞被薑葱茸完全覆蓋，看準一個部位挾下去，掀開薑葱茸才見到挾到的是雞腿或是雞胸肉，不過就算挾到雞胸肉都唔使驚會「嚡」，因為火候控制得宜，啱啱好熟，就算係白肉都軟滑唔起渣，又有人又會鬼殺咁嘈話雞應該要煮到熟一熟，如果有呢個顧慮，奉勸乾脆唔好食雞，否則有如𡁻柴皮一樣，唔食好過。
諗起禽流感如果真係搞出事，又有排唔使食雞，有得食好食。