會計師一向俾人嘅感覺係忠直戇居、粗黑眼鏡、油頭垢面、閉門造車，總之就係冇女仔吼嗰種。點之呢兩年會計師突然間好似開籠雀，逢係選舉就彈十幾二十個人出嚟，重有幾個掛住會計師招牌的老餅走入權力中心；例如麻煩張、寶哥哥、查理士李入晒行會，對面海個特首都重係香港會計師，搞到呢行好似做咗政治人才培訓班。如果我阿利早出世十年，都撈番份公職做吓，好過退休後日日湊孫炒股票。
去年大行老闆要乞票
講開選舉，一年一度會計師公會選舉又開波。上年爭到㷫烚烚，有班立法會落選參賽者玩，重有舊事頭分會派出刺客參戰，務求潛入敵方陣地。總之天下大亂，搞到個個有頭有面嘅大行老闆，四出學CS去乞票，驚失手落選冇飛士。
今年聽講冇舊年咁墟冚，應該唔會出現上次咁壯觀嘅場面。大行只有「Earn士」要選，其他三間可以印印腳，毋須要捉住啲員工叫佢哋簽名畀票。
舊事頭分會再派刺客
舊事頭分會據聞都會再派去刺客，不過要搵參加人選都幾頭痛。大佬，個個星期要開一日會，你估班會計師好似我阿利退休唔使做？邊有人咁笨肯壯烈犧牲？雖則人選難尋，但港英大戰單嘢只不過凍咗，未完。所以，重係暗藏殺機。
老實講，同好多會員一樣，邊個選到邊個選唔到，我阿利真係話之你，但求交完會費掛個招牌搵兩餐茶錢算數。不過，退休後無無聊聊，就當買馬仔剔吓名博吓心水。𠵱家都未知有幾多隻馬出，遲啲出咗排位再同大家分析。