無綫《萬千星輝賀台慶》本周六殺到埋身，為爭奪當晚「最佳女主角」獎項，大熱門汪明荃（阿姐）和郭可盈連日來已頻頻發功拉票，其間郭可盈為攞女主角獎，竟叫阿姐讓路攞「萬千光輝演藝大獎」這個「老人」獎，令阿姐大皺眉頭之餘，更惹來他人圍剿，如黎姿力撐阿姐說：「佢（可盈）想攞咪畀佢囉！」令女主角戰況變得愈來愈熾熱。按目前形勢，阿姐無論資歷和支持者方面，似乎亦勝過可盈，究竟可盈如何突圍而出？在「女主角」爭奪戰中又鹿死誰手？
汪明荃憑《我的野蠻奶奶》的破格演出，成為今年無綫台慶「最佳女主角」頂頭大熱，風頭一時無兩。雖然阿姐於○一年台慶時已憑《婚前昏後》贏得「我最喜愛女主角」（即最佳女主角獎前身），但獎項哪會嫌多？阿姐對今年角逐女主角獎榮譽亦寄予厚望。
「我重有資格攞」
阿姐日前說：「有得攞就梗係攞啦！獎項呢樣嘢係證明演員嘅演技獲得認同，對演員付出努力嘅表揚！」盛傳郭可盈以簽約無綫為經理人，作為交換「女主角」獎的條件，阿姐對此笑說：「我諗唔會啦！如果咁講嘅話，我咪重耐，重有資格攞獎？我簽咗無綫幾十年喎！我相信一定好公正。」
問阿姐今次攞獎信心有多大？她說：「咁我對自己都好有信心，始終呢個角色對我嚟講係一個突破，成套劇嘅口碑同收視都好，觀眾又鍾意，最緊要係我個角色雖然係野蠻，但係唔乞人憎吖嘛！」外界視郭可盈為阿姐的勁敵，但阿姐心中的勁敵卻另有其人，阿姐說：「我都睇好新抱仔胡杏兒，佢喺《野蠻奶奶》裏面做得好好，亦都因為佢，激發我豁出去做好角色。」
羅家英：撐硬阿姐
汪明荃憑《我的野蠻奶奶》角逐無綫台慶「最佳女主角」，男友羅家英日前在電話訪問中力撐阿姐一定獲獎，他說：「我撐硬阿姐，不過我覺得阿姐應該用平常心去面對攞獎，咁嘅心態唔會畀自己咁大壓力。」
真性情演出
問家英哥可有看過阿姐在《我》劇中的演出？他說：「我都有睇過，不過唔係集集追。阿姐誇張嘅演繹方法好特別，好啱呢個角色。佢豁出去演，我覺得好得意，對個角色好有幫助。」家英哥可覺阿姐的性格跟野蠻奶奶相似？他抵死地說：「部份性格似真人，又唔係完全似晒嘅，阿姐呢次演出，我畀九十分。」
羅家英又怎看阿姐勁敵郭可盈？他竟反問記者：「佢演過邊套劇？」記者告知郭可盈憑《心花放》和《酒店風雲》兩劇入圍時，他才恍然大悟。
郭可盈去年忙個不停，她先後拍攝了無綫劇集《心花放》和《酒店風雲》，結果皇天不負有心人，兩套劇集的用心演繹都讓可盈入圍角逐本年度無綫台慶的「最佳女主角」獎。可盈對於自己有雙重機會問鼎，自然喜上眉梢，並很有信心奪獎。根據戰況顯示，「最佳女主角」差不多是可盈和汪明荃之爭。
角色夠深度
問可盈認為自己的演出比阿姐有何優勝之處？她日前說：「其實好難比較，大家劇種唔同，我喺《酒》劇嘅角色好有深度，個劇好有故事性，尤其我扮演嘅角色Becky份人好有心計，所以演繹時一個眼神同一個動作都唔可以太露。反而阿姐套《我》劇，佢扮演嘅『野蠻奶奶』就容許佢用好誇張嘅演繹方法，可以好容易就吸引到觀眾注意。」
換句話說，可盈是否十拿九穩得獎？她說：「攞獎嘅嘢好講緣份，獎項得一個，人人都有資格攞，呢啲嘢好講天時地利人和嘅。」
林文龍：個個都睇好
郭可盈夫婿林文龍十分關注無綫台慶「最佳女主角」的候選名單，問他會否特別看好憑《心花放》和《酒店風雲》兩劇提名的郭可盈？他日前在電話中說：「我個個都睇好！」
得閒先捧場
林文龍表示一些有份提名的劇集沒有看過，但可盈主演的兩套劇都有追看，林文龍說：「我得閒咪捧場，我兩套劇都鍾意。」
可盈勁敵汪阿姐憑《我的野蠻奶奶》獲男友羅家英一面倒力撐，相對來說，林文龍則十分圓滑，他看好每位候選人，並沒特別力撐老婆，林文龍說：「我個個都撐，因為個個都好畀心機做。」
採訪：戴彩煥、比華利、卓美娟
郭可盈圖片攝影：林德雄
服裝：SistyrMoon
髮型：VanChan@Hair
化妝：DorisMak
