近來冇喺公眾場合曝光一段時間嘅香港總商會總裁翁以登，噚日突然爆出兩單新聞，首先係佢將於明年初離開香港總商會，跳槽到星巴克咖啡公司做大中華區副總裁，幫手喺大陸賣咖啡。其二係佢被曾特首委任為政府策略發展委員會中負責經濟事務嘅成員。
翁總裁喺總商會做咗8個半年頭，其間國內省市到香港招商，好多領導都會拜訪總商會，佢同班省長市長建立咗良好關係，曾特首委任佢幫手喺中港兩地經濟發展問題上提供意見，係好適合嘅人選。
不過，佢將來嘅工作基地將會遷到上海，為星巴克打開大陸市場，日後佢就要忙於兩邊飛。佢自己都話，日後嘅工作除咗大陸，亦會包括香港同台灣市場，佢會繼續同香港保持密切聯繫。佢又話，自己不時都同啲年輕人講，要不斷接受挑戰，佢就身體力行，作出今次大轉變。華華相信，翁總裁上咗上海後，傳媒會對佢好懷念，因為佢對記者逢問必答，有佢在場必定可以交到功課。至於做星巴克，可能重好過入貿發局啦。
李華華