鄭希怡（Yumiko）小時候曾在上海少年宮學了六年芭蕾舞，回想當年苦練舞功流了不少血和汗，試過練習拱橋時頭撞地，亦試過練到腳趾起水泡和流血黐襪，要用膠布包住十隻腳趾。
鄭希怡三歲時在上海少年宮跟隨老師學跳芭蕾舞，一學就六個年頭。現在身為跳舞女王的她，當年原來十分討厭跳舞，因為學跳芭蕾舞的過程實在很痛苦、很疲累。
過程刻苦
日前Yumiko在九龍城排舞室再跳芭蕾舞時說：「初初真係好唔鍾意，因為拉筋好攰，嗰時最慘就係學拱橋，我條腰唔夠人哋軟，因為要拗到雙手掂地，試過個頭撞落地。」
Yumiko續說：「後來練到啦，又要拗腰拗到雙手捉住對腳，頭要掂到屁股。我拗咗成堂都唔得，好唔忿氣，返屋企再練，終於做到就開心到大叫！芭蕾舞嘅學習過程好刻苦，每個動作都要勤練，要好堅持至可以完成。」
拉長線條
Yumiko慨歎學跳芭蕾舞真的有血有汗，她說：「我記得細個練完舞返到屋企，啲血係黐住對襪，起晒水泡，每次要用膠布黐住十隻腳趾。嗰時單係練拉筋動作都要練兩年，練習時，成個人嘅線條都要盡量拉到最長，一個姿勢維持十分鐘。雖然跳芭蕾會令到小腿變粗，但學咗之後唔會寒背，同埋到𠵱家都可以拉到筋，不過估唔到十幾年後，自己嘅工作竟然係以跳舞為主。」
採訪：朱倬誼
攝影：何榮亮
場地：ARJDanceCulture
