唉，真係風水輪流轉，以前男追女隔重山，女仔要風得風，要雨得雨，𠵱家？睇見班小學生就知啦，小肥、偉仔同家明係種植班的三名僅有壯丁（全班30多人），個個女同學對佢哋都鬼咁好，有糖有蘋果有蛋糕都預埋佢哋一份，「細路哥邊有你諗得咁複雜！」阿標話其實因為佢哋係男仔，比啲女仔有氣有力，成桶泥都係靠佢哋搬搬抬抬，個個變晒大英雄啦！記得有次教他們堆肥找材料，他爸爸開餅店，負責找蛋殼；那個媽媽賣菜，就負責搵菜葉……人人分工合作；有日小眉則話要上山找芭蕉樹，但樹幹內充滿水份，重到抬唔郁，重揼親自己隻腳呱呱嘈，偉仔見狀即時撲前幫手，一個人抬碌樹幹落山，嘩，幾Man呀！自此小眉就當他偶像咁拜！可惜，好景不常，「你睇，我搵咗幾多條蚯蚓，堆肥好有用㗎，佢哋最愛食有機腐殖質，之後在體內分解，排出的糞便是最好的肥料……」「哇……」小眉一心想把辛苦搜集回來的蚯蚓跟偉仔「分享」，誰知偉仔怕得要死，彈開幾丈遠，英雄形象轉眼一掃而空，唉，今次真係幫佢唔到！（四十三）
阿花