近呢一年以來，由於油價同原材料上升等因素，工業股一直冇啖好食，但正如經紀黃早排提過，個別工業股因跌得過殘，已經有留意價值，例如建滔化工（148）就係其中一個例子，另外部份細size嘅工業股，都可以列入考慮之列。
經紀黃話，二三線工業股中，利民實業（229）向來派息紀錄穩定，現價往績PE7.2倍，息率6.67厘，其實頗吸引。公司早排以5.28億元出售觀塘道商廈，家陣揸住幾億銀現金，可能有特別股息派都唔定。
至於利民旗下的煙紙業務，早排減持5％賣畀一間奧地利公司，幫呢瓣生意搵咗個策略性股東，如果能夠成功分拆上市，會為利民帶來特殊利潤，所以利民應該有得諗。
利民股價一直平穩，昨日無起跌，收2.40元，成交股數33萬股，金額80萬元。
另外，早前因業績錄得過億銀虧損急挫的萬威科技（167），昨日急彈13%，收0.52元，但經紀黃話只係技術性反彈。
慕容小初