發輪稱王的法興，噚日唔發輪改為發獎，呢個獎名為「2005年投資者創新金融產品大獎」，係新設嘅獎項，得獎者係恒基地產主席李兆基。呢個獎係表揚佢多年嚟一直對法興嘅支持同鼓勵；其實咁即係獎勵啲乜，大家都唔係好關心，最關心反而係：咁嘅獎，四叔會唔會嚟攞？
結果皆大歡喜，四叔唔單止到，重帶埋左右手、恒基地產副主席林高演、次子李家誠一齊出席。四叔致辭時更不忘「爆肚」，原本嘅講辭係「法興在全世界經常推出多種類型嘅投資產品，時常廣納意見，改良產品，甚至為客戶度身訂造，以達到既安全又有理想回報的目的。」四叔就額外加上更傳神嘅演繹：「佢哋左搭右搭，要肥有肥，要瘦有瘦，難能可貴，幾好。」聽落有啲似賣叉燒。