呢排市道認真麻麻，地產代理行要裁員減分行，規模較細嘅京士活物業，噚日重盛傳執笠㖭。不過，京士活物業董事總經理劉軒成話，個市唔係咁人心惶惶，只係業主大幅加租，皮費太重，所以要摺咗啲冇錢賺嘅分行，借勢重整。
佢承認，過去三個月，關閉咗五間分行，其中四間喺新界西北，以元朗及天水圍嘉湖山莊為主，一間喺尖沙嘴「地產街」柯士甸道。大角嘴奧海城分行就啱啱拉閘，計完數至知係咪重開，但全部十四個員工已經遣散。
劉軒成話，未來主攻西九龍、沙田、大圍及馬鞍山，因為較有把握賺到錢。佢哋啱啱以十三萬八，租用馬鞍山中心龍頭舖，夾埋有十二間分行。
電郵地址：[email protected]