早前任總喺立法會打開口牌，話又有銀行提供P減2.6厘的低息按揭貸款。華華一打聽，得知夥拍代理推「P-2.6厘」嘅係一家美資銀行，佢嘅P係7.75厘；夥拍代理推出首年定息5厘、其後浮息P減2.5厘嘅，又係另一家美資銀行，佢嘅P就係7.5厘，香港得三家大美資銀行做樓宇按揭，P係7.5厘嘅更只得一家，心水清嘅朋友應該估到答案。
雖然按揭業務息差窄，銀行界仍樂此不疲地搞按揭優惠，好似滙豐咁，年底前借按揭100萬或以上，便可選擇數碼相機作為禮品，借夠700萬或以上更送手提電腦。
臨近年尾，按揭生意已經「到數」嘅銀行，其實已經唔需要靠低息或禮品谷數，可見送禮之意不在按揭，而係交叉銷售其他產品！滙豐都幾高招，唔送現金送禮品，等你無得比較；不過，唔好忘記喎，羊毛其實出自羊身上。
講開又講，滙豐早前被按揭證券公司委任為10億按揭證券的唯一安排行及牽頭經辦行，昨日正式舉行簽約儀式（圖）。