吳君如有咗三個幾月BB，佢噚日凌晨喺主持嘅商台節目《她他她打到嚟》冇提有喜，但爆咗單俾人電話「騷擾」嘅事，呢個人重係佢老闆俞琤，雖然君如冇開名，但佢形容到同開名冇分別。
「係請我嗰個」
君如話：「我今日打電話去『PDDW』轉電話號碼，好煩呀，我有個朋友好離譜，唔生性，好後悔畀咗屋企電話人。」君如話知佢屋企電話嘅只有五個人，田蕊妮、劉德華、曾華倩、佢老闆同屋企人，其中一個朋友唔理三時七刻，一諗到有嘢都打畀佢，明知君如夜晚兩點收工，都會朝早九點打去。
君如終於頂唔順要轉電話號碼，拍檔鄒凱光搭口話：「佢朝朝早返工時聽番你節目後，打畀你？」君如好嬲咁話：「朋友應該知我作息時間，何況你係請我嗰個㖭！」好明顯，君如講緊嘅係佢老闆俞琤啦。夠膽喺電台度咁話自己老闆？君如都幾勇，佢解釋話：「我驚佢有一日打電話畀我唔通，問我要番屋企電話，我𠵱家講埋我係唔會再畀佢㗎！」