長榮航空嘅吉蒂貓（HelloKitty）彩繪機自上月推出以來，大受歡迎，而機上提供五十幾種客艙用品，就成為拍賣網站嘅熱門商品，一副吉蒂啤牌可以賣一百蚊（港幣．下同），就連嘔吐袋現時叫價都一百二十蚊，絕版彩繪機模型更飆升到七百蚊，真係唔到你唔服！長榮睇準美國人鍾意企鵝，已經計劃另一部企鵝彩繪機，專門往返台北至美國航線，話唔定到時又會出埋企鵝客艙用品。