個市有啲詭譎，下晝3點零3分，恒指高台跳水，落到14541，大散198點。尾市兜番上啲，埋單唔見111點，低位回升87點。
期指低水92點，計埋滙控（005）下周三除息1.09元，拖低恒指39點嘅因素，期指實際低水53點，唔使太慄。況且，好多時低水唔係代表個市有問題，而係啱啱相反。
恒指C輪9734：大市如果再低啲，買恒指C輪博反彈，唔狼嘅做法，揀9734，明年4月杪夠鐘，輪價18.6仙，溢價4.3%，槓桿率13.8倍（有效8.5倍），引伸波幅21.5%。恒指每變動100點，隻輪理論上落6%，照公式計，昨日變多咗。
狼嘅做法，揀3462，要留意，隻輪年底到期，溢價1.6%，打埋滙控除息因素，實際溢價係1.9%。
太AC輪3985：太A（019）收69元，跌0.40元，C輪3985收62仙，跌7仙。隻輪平水，槓桿率11.1倍（有效亦係），唔使計引伸波幅，數據本來唔錯，弊在下周五最後買賣，想坐耐啲都唔得。其他太A輪，成交好少，難買賣。
章盛