呢期人人講起創業板，只係識得講救亡，其實家陣創業板股，亦有好多好股票，值得識貨嘅投資者去發掘，其中搞緊轉去主板上市嘅山東威高（8199），上市以來業績一路交得準，加上街貨由數個基金揸晒，股價可以愈升愈有。
山東威高剛公布今年頭9個月業績，盈利增長50.9%，有6654.9萬元人民幣。單係呢條數，已經高過去年全年嘅盈利，公司增長快速可想而知。
山東威高主要生產一次性醫療器材，例如針筒等，近年油價上升，令主要生產材料塑膠的價格大幅上漲，但公司盈利仍有咁高增長，原因係產品改走高檔路線。除現有產品外，威高會發展骨科材料和血液淨化產品。
雖然市場對山東威高認識有限，但有數個芬佬特別對佢鍾情，不斷在市場上默默吸納，所以股價表現好似矮仔上樓梯，穩步上揚。昨日再升3.65％，收1.42元，成交股數151萬股，金額212萬元，股價創上市以來新高。
慕容小初