郭富城憑電影《三岔口》首度獲封金馬影帝，他獲獎後先赴大會慶功宴，再往吃麻辣火鍋。城城甫返港便往弄狗，難怪他接受訪問時說：「也想身邊有個女人！」不過林海峰昨日卻暗指城城的演技抄襲《七宗罪》的畢彼特。
現年四十歲的郭富城，出道時憑在台灣拍攝的一個機車廣告竄紅，然後進軍樂壇，昨晚他又憑電影《三岔口》獲十一人組成的金馬獎大會評審投得十票，以大比數壓倒只有一票的《黑社會》主角梁家輝成為金馬影帝，評審團主席陳耀圻以「驚豔」來形容城城的演出。
城城榮登金馬影帝，為演藝事業再創高峯。他前晚獲獎後即赴大會的慶功宴，再趕到台北的太和殿吃火鍋，城城接受台灣傳媒訪問時說：「現在我四十歲了，也想身邊有個女人，談一場轟轟烈烈的愛情，過去四、五年媒體報道我事業走下坡，或許我真的是在谷底，也感受到世間人情冷暖，現在拿下影帝，終一掃陰霾。」
凱旋返港
Fans列隊歡迎
城城昨日乘坐早機返港，他拿着獎座出閘，意氣風發，約十多名影迷拿着鮮花、香檳、橫額和禮物往接機。問城城會把獎項放在哪裏？他說：「我會放喺屋企當眼嘅地方，好似玄關咁，我都踏入四十歲，覺得今年攞獎係人生轉捩點，希望之後拍更多好作品，係新開始。我本來今日即刻要去馬來西亞同楊采妮拍譚家明嘅新戲《父子》，但佢知我攞獎，特別畀我放一日假，聽日先過去。」
舒淇透露取得金馬影后的下一個目標是結婚生仔，城城下個目標可是一樣？他說：「我希望變成頒獎禮嘅常客，我係影圈『新鮮人』，未咁快結婚生仔，三十歲時曾經有過結婚衝動，𠵱家就冇咁諗，我希望追番呢十年喺影圈失去嘅嘢。」
躍升影帝，城城可會加片酬，他說：「呢啲要經理人傾，唔係最重要，我想遇到好導演同好劇本，就算拍荷李活片同法國片，唔加片酬都得。」城城之後第一時間坐保母車到跑馬地買早餐，然後到寵物店攬着迷你貴婦狗，分享稱帝的喜悅。
另外，有份參演《三》片的林海峰昨日在主持商台節目《在晴朗的一天出發》中，大談對城城奪獎的感受，他在節目開始時說：「郭富城攞金馬影帝喎！唔好講笑，套戲我有份做㗎，點解佢唔喺台上多謝我呢？」
城城首次提名電影獎項，便奪得金馬影帝殊榮，林海峰笑指城城奪獎等同取得奧斯卡，他對城城前晚在台上的表現稍有意見，林海峰說：「城城嘅感謝詞千篇一律，佢用好凝重嘅演繹，去演繹好普通嘅演詞。」他還暗指城城在《三岔口》中的演繹與畢彼特（BradPitt）在《七宗罪》中類似，他說：「我重嫌棄佢點解唔多謝BradPitt呢？我覺得BradPitt對佢喺呢套戲有一個好大嘅幫助，我好肯定佢睇過《七宗罪》先入去roll機。」
拍檔暗寸
「獎嚟得太早」
林海峰續說：「呢個case令我諗起今年傑青，好多男歌手同女歌手攞到傑青可能都係同等情形，就係之前做緊嘅嘢，未係大家諗到，可能佢喺歌曲或者演唱會同演戲有好多付出，但係未至於打咗個好靚嘅底，所以每人有個問號喺度，跟住又令我諗起仙姐代阿任姐攞一個終身成就獎之類，佢講咗經典嘅一句『獎項唔係嚟得太早就係太遲』，郭富城呢個case，就係喺觀眾心目中嚟早咗。」
採訪：馮美茵（台灣）、藍文浩（香港）
攝影：陳慧安（台灣）、娛樂突發組（香港）
