無綫劇《阿旺新傳》上星期收視再飆升，平均有三十四點，即係有二百二十三萬觀眾睇，成為無綫𠵱家收視最高嘅劇集；咁啱《阿旺》監製黃偉聲同拍拖多年嘅女友李婉嫺拉埋天窗，噚晚佢哋喺尖沙嘴新世界萬麗酒店擺喜酒，筵開二十幾圍，加上無綫台慶當日又係黃偉聲舊曆生日，對新郎哥嚟講簡直係四喜臨門啦！
羅嘉良請假飲喜酒
雖然阿旺郭晉安喺內地拍劇返唔到香港飲喜酒，但郭可盈、林文龍、羅嘉良夫婦、李家聲、羅敏莊同男友陳國邦，以及曾勵珍等無綫一班高層幕後都有到賀，場面就好似台慶食飯咁熱烈！嘉良話：「我本來喺北京拍緊《鄭和下西洋》，今晚特登請假返嚟飲！」
噚晚陳國邦唔止做賓客咁簡單，佢重幫一對新人拍Video，羅敏莊就幫新人做跑腿，馮仁昭問幾時輪到佢哋請飲時，羅敏莊恨嫁恨到出晒面咁話：「我都希望快啲！但到時唔會大搞！」
另外，鄭伊健、元華、胡杏兒、湯盈盈馬德鐘和張兆輝等夜啲都趕到嚟祝慶一對新人，馮仁昭問湯盈盈點解唔攜眷出席時，佢好抵死咁話：「攜眷？禮券就有攜！」
