呂志和間嘉華集團五十周年，昨晚在會展筵開八十二席，請咗曾蔭權同王鳳超主持亮燈儀式，其他嘅賓客如梁愛詩、郭炳江炳湘兄弟、李國章李民橋叔姪、湯家驊伉儷，重有梁伯韜、林建岳、施永青等等等排住隊嚟恭賀呢位酒店大王，唔怪得佢講到自己艱苦創業時都好感觸。
可能係慶祝金禧，場地布置燈光以至大鑼大鼓跳跳吓嗰隻獅都係金色嘅；呂志和夫人當然成身金閃閃，佢位千金呂慧瑜同媳婦亦係一襲金衣，同個場襯到絕。
五十年唔算短亦唔算長，呂志和十幾歲走難來港，身無分文，後來創業做石礦做建築，然後做酒店做地產，最近重成為賭業大亨，攞咗澳門其中一個賭牌，都算發展奇速。嘉華現時有二百間附屬公司，員工一共萬五人，已經係一個相當大的企業，班仔女又接到班，呂志和真係大有面子見江門父老矣。
李華華
