陳慧琳（Kelly）、賭王何鴻燊和四姨太梁安琪等前晚在會展出席保良局一百二十七周年慶祝晚宴。Kelly露出腰肢，承認發福不少。提到圈中女星相繼懷孕，Kelly即表示還要努力工作，數年後才計劃生育。
保良局前晚在灣仔會展筵開四十七席，舉行一百二十七周年慶祝晚會，籌委會主席梁安琪獲賭王何鴻燊撐場，並邀得房屋及規劃地政局局長孫明揚擔任主禮嘉賓。歌手陳慧琳、呂方、關淑怡、藝員商天娥及汪明荃演唱助興之餘，更現場錄影第八集《名曲滿天星》。
內地工作致肥
Kelly一身黑色衣裙似要掩飾發福身軀，她說：「係呀！我係肥咗少少，到內地做嘢，一日三餐定時，咪食多咗！」最近不少女藝人懷孕，Kelly說：「吓？唔係以為我有咗，最近係好興生仔，不過我唔興住，我唔急，係我兩個好鍾意細路仔，但係未準備好。」問Kelly不怕做高齡產婦，她說：「都驚，冇辦法啦，咁多嘢做，做完嘢先，我起碼都要博多幾年。」
賭王跳舞籌款
有總理捐出三十三萬元，寓意賭王生生猛猛，邀請賭王跟四姨太梁安琪表演探戈，之後二人繼續跳舞自娛。對於女兒何超儀打算兩年後生BB，賭王說：「佢兩個咁大個人會自己決定，我知個女好想攞影后，我都希望佢攞到，佢自己有分數。」
問賭王希望抱男孫定女孫，他斬釘截鐵說：「幾時都鍾意男孫，姓何好。」賭王又表示經常催促兒子猷龍努力造人，他說：「我已經催佢好多次。」
採訪：楊潔雯 攝影：何榮亮
