禽流感疫情未明，又傳有「沙士」疑雲，正一係一波未平，一波又起，噚日午後市勢突然急轉直下，但仄嚟仄去，都仄唔到料；總之，一朝被蛇咬，見到草繩都驚餐懵嘅。
其實，大市連升咗4日，調整已係意料中事，不過噚日跌勢急，令人不安。恒指收市14629，跌111點，成交171億元；期指個勢重弱，收14537，大跌170點。家吓10日線係14572，20日線係14493，只要守穩兩線之上，都可視為升後調整，一升破50日線（14849），就可向15200進發。
噚日幾隻大藍籌又成為開刀對象，至於二三線股，個勢並唔算太差，上升股（唔計認股證）重超過200隻。滙控（005）喺大藍籌中個勢最強，早市去過125.10元，午後最低掟到落124.10元，但上番124.50元平收。
中移動（941）同長實（001）又一度掟到散咗，中移動最低跌到35元，但上番35.65元收，埋單跌0.50元；長實落到77.40元後上番78.30元收，跌0.90元。至於和黃（013），由於傳意3G會延遲上市，冇力反彈，收73元，只係比低位升番0.15元，重大跌1.50元。
前景獲大行看好
中移動回軟，但中電信（728）就好硬淨，收2.65元，逆市升1個位，大行對撼得好犀利，成交亦由上日的約5000萬股增至6230萬股。中電信股價由8月中的3.275元回落，已經歷3個月，中期調整可能已完成。近大半個月來，中電信走勢形成高低腳底部，頸線在2.65元，突破後升勢可確認，初步目標係2.85元。
看好中電信，主要係其增值服務同互聯網服務持續有增長，而現時股價亦只反映其固網電話業務價值，未有反映移動電話業務，雖然現時有消息指內地3G發展仍未明朗，但3G要在08年北京舉辦奧運前面世，有關發牌工作不會再延遲，而中電信有九成九機會可以獲得1個牌照。
花旗美邦指中電信全年收入可達1640億元人民幣的目標，維持其「買入」評級，目標價3.20元。麥格理證券則指內地電訊業重組中，中電信將會係贏家，而市場亦高估其風險，給予其「優於大市」評級，1年目標價3.57元。
郭兆誠