國民黨榮譽主席連戰嘅夫人連方瑀，噚日喺灣仔會展出席香江文化交流中心主辦嘅兩岸關係論壇，推介佢本憶述為期八日和平之旅嘅新書《半世紀的相逢：兩岸和平之旅》，冇官一身輕嘅梁愛詩都有嚟捧場。
兩個月前先同丈夫慶祝結婚四十周年嘅連夫人話，新書初稿曾俾「戰哥」過目，為此連戰犧牲咗唔少睡眠時間！由二十五歲起就寫作嘅連夫人又話，寫書時成日同丈夫一齊討論，初稿都會俾佢過目。「戰哥不是有甚麼了不起！而是因為他最清楚我，會告訴我可以改善和修改的地方。」
台灣大學政治系教授張麟徵就踢爆，連夫人私下會稱丈夫為「老乖」，而連戰則會以「小乖」回敬。
連家今年嘅大陸「和平之旅」令佢人氣急升，所以上個月連夫人同丈夫去歐洲旅行時，就俾唔少大陸、甚至係韓國同日本遊客認出，紛紛要求同佢兩夫婦合照。
爆料熱線：29290000、27860099
報料傳真：26239278
報料電郵：[email protected]