近年追求人生享受的關之琳主攻在內地拍攝廣告，美國總統布殊即將訪華，有傳北京將受到恐怖襲擊，之之輕鬆面對，更揚言若注定一死，「嘭」一聲炸死不失為痛快的死法。
關之琳昨日以代言人身份，在沙田出席護膚品牌MarjorieBertagne宣傳活動，吸引大批巿民圍觀。關之琳剛從巴黎、英國度假返港，她與在場的可愛法國小孩齊齊扮拆禮物時，卻揚言對小朋友沒有興趣，面對圈中女星王菲、吳君如等相繼懷孕，亦不為所動。
享受單身
之之說：「唔會效法佢哋（生仔），我都冇呢個衝動，每個人對生育同婚姻有唔同睇法，我就好enjoy單身，生仔、結婚對我都唔係太需要。」前男友黃家諾被拍得拖洋妞夜蒲相，之之說：「幾好呀，人哋係正常男仔，係真咪替佢開心，係假就唔好畀太大壓力佢。」
問之之二人可有機會復合？之之說：「冇人可以講肯定嘅事，人生短暫，應該做多啲開心事，可能心血來潮，想法又會改變。」之之透露今年狂拍十七個廣告，其中十六個都在內地拍攝，所以逗留內地時間甚多，更分別在北京、上海置業。
生死注定
近日內地傳出將受到恐怖襲擊，之之絕不擔心說：「注定嘅話，坐飛機都會死啦，嘭一聲死咗咪好爽囉！我嘅想法一向好正面，若果注定一死，咁樣都係快樂嘅死法呀！」問她可有立定遺囑，之之大方說：「有呀，我二十幾歲已經寫咗，安排晒。否則我有事，啲文件、投資，媽咪到時咪搵餐死。」
此外，之之表示已傳短訊恭賀舒淇成為金馬影后，她表示自己不奢求獎項，之之說：「上天已經賜咗好多嘢畀我，獎係錦上添花，我已經過咗想攞獎嗰幾年，而且拍戲係非人生活，除非遇到好好劇本，否則好難打動我。」她又有慰問拍戲傷腳的劉德華。
採訪：RitaLeung
攝影：RickyChan
