大閘蟹呢期喺政圈搶晒鏡，唔單止各政界為食貓相約去歎當造蟹，就連肥彭上星期去煲呔官邸聚舊，煲呔都擺出大閘蟹陣勢，喺啲蟹羔蟹蓋蟹殼之間，同肥彭把酒話當年。唔好睇少呢種大閘蟹政治，可能大家專心一意揸住個蟹鉗鉗嚟鉗去，唔覺意間鉗出真心說話，而非全係外交辭令。
肥彭就唔覺意同《蘋果》爆咗，係董A1第一次請佢食大閘蟹，嗰時佢已經委任咗老董入行政局，佢重笑話大家都好不厭其煩教佢點用鉸剪食蟹，但佢始終覺得食一隻蟹太複雜。
事實上，呢期政圈中人好鍾意約埋三五知己齊齊食蟹。好似上個星期三咁，嗜蟹嘅民建聯黃定光約埋成班老友記，包括行會成員鄭耀棠喺中華進出口商會飯堂筵開蟹宴，諗住開開心心大擦一番，點知嗰日立法會要講嘢嘅人特別多，結果黃定光搞到成夜晚十一點半先收工，半夜由立法會飛去上環蟹場會友。
當佢以為大家都食到飽晒時，先發現棠哥同班老友記喺度打牌消磨時間，堅持等到佢嚟先肯一齊食，真係好唔話得，難怪黃定光都話嗰餐蟹宴食得好滿足。
梁振英太太日食八隻
政圈入面，邊個係食蟹狂熱分子呢？呢個大冷門相信好難估，就係梁振英太太唐青儀，有人重封佢為「蟹后」。梁太有幾犀利？據聞佢最高紀錄係喺夜晚七點至凌晨三點，一次過食咗八隻蟹，重要食得好仔細，逐隻蟹腳慢慢品嘗，唔知CY（梁振英）又有無咁狂熱呢？
親政府人士鍾意圍埋講東講西，講吓時勢講吓政治，咁民主派又會唔會整餐蟹宴呢？據八方得知就好少喇，大多數都係各有各食。肚腩愈嚟愈大嘅李卓人都話自己好鍾意食大閘蟹，重一派專家feel咁話蟹乸啲羔硬無咁好食；公嗰啲就唔同，所以自己梗係鍾意食公嘅啦。阿人話民主派好少搞呢啲政治蟹局，自己通常都係同屋企人慢慢歎。
民主黨肥仔明就呻話，以前肥龍做積金局時，都有約民主黨食黃油蟹，但佢做咗政務司司長之後，就無呢支歌仔唱喇（達仔亦唔肯去食）。如果肥仔明口痕，咪同屋企人食囉，但因為佢怕膽固醇過高，所以一年食兩次到咋，每次就最多就食三隻啦，無梁太咁勁。
自由黨都好鍾意蟹宴，以前丁午壽重請埋立法會秘書處一齊享用，不過，佢今屆冇得做議員，就食少咗啫。
爆料熱線：29290000、27860099
報料傳真：26239278
報料電郵：[email protected]