潮流興講時間表，連鄉議局主席劉皇發日前喺「開發邊境禁區──機會與挑戰」論壇上，都要求政府就開放邊境禁區訂出個時間表，當然煲呔肯踏出第一步佢都好高興。
八方噚日見到鄉議局副主席張學明，佢話塊地咁大，真係可以諗吓點用，可唔可以吸引到一啲如家具業回流。
其實，煲呔真係錫晒鄉議局，上星期行會就拍板以月租一千蚊批出沙田石門一幅成四千平方米嘅空地畀佢哋起新會址。張議員話，呢件事講咗好多年，佢哋因為九龍塘嘅現會址唔能夠起高，所以只好搬走，九龍塘塊地預計可以賣到六千萬；而新址建築費要成八千萬；加上鄉議局想成立一個約二千萬元嘅基金，以現代化嘅方式嚟運作，所以一共要多籌四千萬先夠數，咁大家要落力啲啦。新界人鍾意聽粵劇，最新雛鳳鳴復出演《西樓錯夢》為港大籌到八百萬，張學明可以諗諗搵阿石哥幫吓手。
爆料熱線：29290000、27860099
報料傳真：26239278
報料電郵：[email protected]