過去大半年，食品股都算多災多難，而中國糧油國際（506）算係最唔好彩一員，次次有親食品壞消息都會受波及，但近期股價跌到低殘時傳出重組消息，值得望多兩眼。
中糧唔好彩嘅遭遇，始於年中中盛糧油（1194）話炒輸黃豆期貨開始，不但中盛股價勁插，中糧股價亦被波及，由4元邊跌落嚟，其後內地爆發豬鏈球菌，跟住禽流感又殺到埋身，由於中糧有從事家禽飼料，股份自然又成為被質對象，股價再由3元水平插落最低的2.65元，真係睇見都心傷。
在發生一連串不幸事件後，中糧近日同證券界會面，話可能同阿媽一齊搞業務重組。中糧自從新老總入主後，證券界已傳出中糧會分拆長城酒業，今次重組消息可以話係舊事重提。由於中糧股價低殘，估計可借消息反彈，有一定值博率。
中糧上周五升1.74％，收2.925元，成交股數71萬股，金額209萬元。成交咁奀，似乎係慢火煎魚嘅格局。
慕容小初