圈中女藝人甚少打泰拳，外形野性的張文慈卻偏偏向高難度挑戰，雖然她只學了五年泰拳，但已獲師傅大讚技術到家。日前張文慈在尖沙嘴一間拳館為大家示範基本泰拳招式，包括攻擊直拳、勾拳、腿擊和膝撞等，真的似模似樣！
張文慈當初純為工作學打泰拳，及後深被這種運動吸引，她日前說：「好多時都要拍打戲，除咗工作需要外，我覺得女仔都應該學番幾招，況且我一向鍾意睇拳賽，就咁開始學打泰拳。有啲人覺得打拳係種好粗魯嘅運動，其實打拳好考反應，要用腦筋，喺一兩秒之間決定點去攻擊同閃避，反應敏捷對拍打戲有好大幫助，好多人學完泰拳重會修心養性㖭。」
忌揸緊拳頭
張文慈當日請來泰拳師傅陳德興幫忙，雙方邊對拳，邊講解每個動作，張文慈示範了攻擊直拳、左右勾拳、上下勾拳、膝撞和腿擊，她說：「泰拳好多時會用到手踭，拳頭唔好揸得太實，否則發唔到力。有種叫劏踭，拳霸TonyJaa最出名嗰招，通常呢招都會令對手出血。」
練熟三攻步
泰拳初學者除須熟習出拳功夫外，步法亦十分重要，基本為「三攻步」，即左腳前弓、右腳跟踮地，若左邊腳上就出左直拳（右邊腳上則出右直拳），熟練步法才能抓緊機會擊中對方。
採訪：魯萍 攝影：何榮亮
場地提供：柏龍國際泰拳搏擊中心
